დიეტა

დიეტა ოთხი ფსიქოტიპის წარმომადგენელი ქალბატონებისთვის

დიეტა - ოთხი ფსიქოტიპიკვების სტრატეგია სანგვინიკებისთვის:
ხანგრძლივი დიეტები თქვენთვის არ არის მოგონილი. შეგიძლიათ, მიირთვათ საღამოს 6 საათის შემდეგ და თვეში ერთხელ მოაწყოთ განტვირთვის დღე: ვაშლის, მაწვნის, ბოსტნეულისა და ხაჭოსი. ოჯახურმა დღესასწაულმა მთელი კვირით გიბიძგათ ღორმუცელობისკენ? საშველად ამდენივე ხნით მიმართეთ ფაფებს: წიწიბურას ან ბრინჯს. შეგიძლიათ, მონაცვლეობით მიირთვათ ხან ერთი, ხან – მეორე, ოღონდ, არ მოხარშოთ, ღამით 5 სადილის კოვზ ბურღულეულს დაასხით მდუღარე და დილამდე გააჩერეთ – ასე მეტად შეუნარჩუნდება უჯრედისი და მინერალები. ოდნავ მოაყარეთ მარილი. ფაფა 1 დღის განმავლობაში იმყოფინეთ. ბურღულეულის ასეთი კერძი ორგანიზმისთვის ნამდვილი ჯაგრისია – ყველანაირი წიდებისა და ტოქსინების „გამოხვეტას“ ახდენს. ასეთ დღეებში უნდა დალიოთ მხოლოდ გაზგასული მინერალური წყალი, ჭამამდე ნახევარი საათით ადრე და ჭამიდან ნახევარი საათის შემდეგ, დღეში 1,5-2 ლიტრი.

კვების სტრატეგია ფლეგმატიკებისთვის:
თქვენი ერთადერთი გამოსავალია, მთლიანად შეცვალოთ კვების ჩვეული რაციონი, ანუ, ნელ-ნელა გამორიცხოთ კალორიული კერძები და მსუბუქ, უცხიმო, უჯრედისითა და ვიტამინებით სავსე პროდუქტებზე გადახვიდეთ. მაგრამ, უნდა ეცადოთ, რომ ახალი კერძებიც გემრიელი იყოს, რადგან გემოსა და კვების რეჟიმის მკვეთრი ცვლილება თქვენთვის არ შეიძლება. მაგალითად, თუ ძალიან გაგიჭირდათ, გვიან მსუყე ვახშამზე უარის თქმა, მიირთვით ქათმის ან ინდაურის მოხარშული ხორცი ცოცხალი ბოსტნეულის სალათით, უპუროდ. სამსახურში კი, შუადღისთვის, თან წაიღეთ ხილი და სადილობამდე ნახევარი საათით ადრე მიირთვით. რაც შეეხება თავად სადილს, ნუ იქნება ძალიან ცხიმიანი და შეამცირეთ პურის რაოდენობა. ცომეული კი (ღვეზელი, ლობიანი, ხაჭაპური), უმჯობესია, ნელ-ნელა ამოაგდოთ მენიუდან. თუ ყავის გარეშე ვერ ძლებთ, დღის განმავლობაში იმყოფინეთ ორი ფინჯანი, უშაქროდ. ისე კი, უმჯობესია, ყავა ჩაანაცვლოთ მწვანე ჩაით, რომელიც, შეგიძლიათ, წინასწარ გააცივოთ მაცივარში. რაც შეეხება პურს, საფუარის გამორიცხვის მიზნით, გადადით ცეხვილ შავ პურზე.

კვების სტრატეგია ქოლერიკებისთვის:
თქვენთვის მკაცრი დიეტა მიზანშეწონილიცაა და ადვილად შესასრულებელიც. თანაც, ზუსტად უნდა დაიცვათ საათობრივი გრაფიკი.
თქვენს რაციონში მეტი რაოდენობით ჩართეთ ცილების შემცველი პროდუქტები – ამით სწრაფად მიაღწევთ დანაყრების შეგრძნებას, რაც კარგა ხანს გაგყვებათ.
დილა, შეგიძლიათ, დაიწყოთ 1 ცალი მოხარშული კვერცხითა და სოკოიანი ომლეტით (100 გრამი სოკო + 1 კვერცხის ცილა). ტკბილეულიდან უმჯობესია, აირჩიოთ ხილი, კენკრა, თაფლი – ეს პროდუქტები უზრუნველყოფს სისხლს გლუკოზით და შოკოლადზე ნაკლები ეფექტი არ ექნება გონების სტიმულირების პროცესების მოსაგვარებლად.
ასეთი ბალანსირებული კვება რამდენიმე კვირის განმავლობაში არა მარტო თქვენს წონას მოიყვანს წესრიგში, არამედ ხასიათსაც გაგიწონასწორებთ.

კვების სტრატეგია მელანქოლიკებისთვის:
თუ ტკბილეულის გარეშე ცხოვრება არ შეგიძლიათ, ნუ გამოუცხადებთ საკუთარ თავს სერიოზულ ბრძოლას – ნუ დაითრგუნავთ ფსიქიკას. უბრალოდ, არ დაგავიწყდეთ მთავარი წესი: მირთმეული კალორიები აუცილებლად უნდა დაწვათ, დახარჯოთ სარბენ ბილიკებზე ან აუზში, ანუ, კვებიდან ნახევარი საათის შემდეგ, სულ მცირე, 15-20 წუთის განმავლობაში ძუნძულით ირბინეთ, აუზში იცურავეთ, ან, სულაც ველოსიპედით გაისეირნეთ. თუ სახლში სავარჯიშო ველოსიპედი გაქვთ, შეგიძლიათ, ეს პრობლემა შინიდან გაუსვლელადაც მოაგვაროთ. ასეთი ვარჯიშები (განსაკუთრებით, ბუნებაში, ჰაერზე შესრულებული), გარდა იმისა, რომ გაგახდუნებთ, ენერგიით, ოპტიმიზმითა და ხალისით აგავსებთ, მით უფრო, თუ ყოველ დილას, ყავის ნაცვლად, 1 ჩაის ჭიქა წყალში გახსნილ 1 ჩაის კოვზ თაფლსა და ნახევარი ლიმონის წვენს დალევთ.