დიეტა გულისთვის

სწორად შერჩეული დიეტა გულის დაავადებების სამკურნალო საუკეთესო საშუალებაა. უახლესი მეცნიერული მონაცემების თანახმად, გულ–სისხლძარღვთა სისტემების გასამაგრებლადბუნების მიერ ბოძებული საკვები არც ისე ბევრია, სამაგიეროდ მათი ეფექტი დიდია.

სელის ზეთი ცხიმმჟავა ომეგა–3–ის შემცველობით რეკორდსმენია. გულისა და სისხლძარღვების დაავადებების რისკს 2–ჯერ ამცირებს, ქოლესტერინის დონეს დაბლა სწევს და თრომბის წარმოქმნას აბრკოლებს.

რჩევა: 1–2 სუფრის კოვზი ცომეულში ჩაუმატეთ.
ბროკოლი წარმოქმნის განსაკუთრებულ ცილას, რომელიც გულის კუნთს დაზიანებისგან იცავს.

რჩევა: უმჯობესია ორთქლზე მოამზადოთ.
ნიორში გულისათვის სასარგებლო 70–ზე მეტი აქტიური ნივთიერებაა. აქედან სხვებზე უკეთ შესწავლილია ალიცინი, რომელიც ნივრის რეგულარულად გამოყენებისას წნევას 15–30 პუნქტით დაბლა სწევს.

რჩევა: სანამ კერძში დასრესილ ნივრის კბილს დაუმატებთ, ნახევარი საათი გააჩერეთ – გულისდამცავ ნივთიერებებს მაქსიმალურად აგროვებს.
ოცწლიანი გამოკვლევის თანახმად, ვაშლი ყველაზე ეფექტური პროდუქტია, რომელიც მენოპაუზის შემდგომ პერიოდში გულის კატასტროფის რისკს ამცირებს.

რჩევა: ვაშლის ღვეზელი ნუ გაგიტაცებთ. უმჯობესია სალათებში დაუმატოთ ან დესერტად ჭამოთ.
შავი შოკოლადი გულ–სისხლძარღვთა სისტემის მუშაობას ამაგრებს, არტერიულ წნევასა და ქოლესტერინის დონეს დაბლა სწევს, სისხლის ტვინისკენ დინებას აუმჯობესებს და არტერიული სარქველის ბლოკირებას აფერხებს. ყველაფერი ეს ფლავონოიდების წყალობით ხდება. გაითვალისწინეთ, სასარგებლოა შავი შოკოლადი, რომელშიც კაკაო არანაკლებ 70%–ია.

რჩევა: შაქრისა და ცხიმების სიჭარბის გამო ყოველდღიური ულუფა 30 გრამს არ უნდა აღემატებოდეს.
ბროწეულის პოლიფენოლები ქოლესტერინის დონესა და არტერიულ წნევას ეფექტურად ამცირებს, სისხლის მიმოქცევას აუმჯობესებს და სისხლძარღვების კედლებზე ქოლესტერინის ფოლაქების დალექვას აფერხებს.

რჩევა: ბროწეულმა თავისი სამკურნალო თვისება სრულყოფილად რომ გამოავლინოს, მისი წვენი ხილის წვენებში არ შეურიოთ, არამედ ცალკე გამოიყენეთ. დღეში რეკომენდებულია 150 მლ ახალგამოწურული წვენი შაქრის დამატების გარეშე.
ზეითუნის ზეთი მონოუჯერი ცხიმებითაა მდიდარი, რომლებიც ცუდი ქოლესტრინის დონეს ამცირებს, ხოლო კარგისას ამაღლებს.

რჩევა: 1 სუფრის კოვზი ზეთი 120 კკალორიაა, რაც მოხდენილი ფიგურის შესანარჩუნებლად ბევრია. ამიტომ ზეთის ჯამური გამოყენება (სალათების, წვნიანების, სხვა კერძების შესაკმაზად) დღეში 2 სუფრის კოვზს არ უნდა აჭარბებდეს.
ავოკადოს სარგებლობა მხოლოდ ნახევრადუჯერი ცხიმმჟავებით არ შემოიფარგლება. ნაყოფი ასევე მდიდარია კალიუმით, რომელიც ინფარქტის პროფილაქტიკას ხელს უწყობს. ავოკადო გულის დაავადებებისა და კუნთური ქსოვილის დეგრადაციის რისკის შემამცირებელ სპეციფიკური კაროტინოიდების ათვისებას აუმჯობესებს.

რჩევა: წონაში რომ არ მოიმატოთ, ავოკადო კერძებში ისეთი პროდუქტების ნაცვლად გამოიყენეთ, როგორებიცაა ყველი და მაიონეზი.
ლობიოსა და პარკოსნებს უჯერი ცხიმების, პროტეინების, უჯრედისების, რკინის, კალიუმისა და ფოლიუმის მჟავის მაღალი შემცველობა შეუცვლელ დიეტურ პროდუქტად აქცევს. მათში წარმოდგენილი 8 სახის ფლავონოიდი ჰიპერტონიასთან ბრძოლის შესანიშნავი პროფილაქტიკური საშუალებაა.

რჩევა: ლობიოს ხანგრძლივ კულინარიულ დამუშავებას თავი რომ აარიდოთ, დაკონსერვებულით ისარგებლეთ. გამოყენების წინ ცივი წყალი გადაავლეთ.
გოგრის კაშკაშა ნარინჯისფერი შეფერილობა ბეტა–კაროტინის, ს ვიტამინისა და კალიუმის მაღალი შემადგენლობის ნიშანია, რაც ათეროსკლეროზთან ბრძოლას ეხმარება და გულსა და სისხლძარღვებზე მარილების მოქმედებას აბათილებს. ამას მომატებული წნევის შემთხვევაში განსაკუთრებული მნიშვნელობა აქვს.

რჩევა: შეგიძლიათ გოგრა მოხარშოთ, შეწვათ, ცომში გამოიყენოთ, წვენი გამოწუროთ. ყველა შემთხვევაში თავის სასარგებლო თვისებებს სრულად ინარჩუნებს.
მარცვლეულის, მაგალითად, ხორბლის სწრაფადხსნადი უჯრედისი სასარგებლოა იმით, რომ ორგანიზმში ქოლესტერინის ათვისებას აბრკოლებს. დღეში 1,5–2 ფინჯანი ფაფა საერთო ქოლესტერინის დონეს 9%–ით დაბლა სწევს, ხოლო ცუდისას – 11%–ით.

რჩევა: დღეში ერთი ულუფა მარცვლეულის რაციონში ჩართვა ნორმალური წნევის შესანარჩუნებლად აუცილებელია.
სოკო შეიცავს თავისუფალი რადიკალების (მონაწილეობენ გულ–სისხლძარღვთა და ონკოლოგიური დაავადებების განვითარებაში) გამანეიტრალებელ ანტიმჟავა ერგოთიანინს შეიცავს. ასევე მდიდარია კალიუმით. მაგალითად, 100 გ თეთრი სოკო მინერალის დღის ნორმის 15–20%–ს შეიცავს.

მწვანე ჩაის რეგულარულად მოხმარება ოსტეოპოროზისა და ართრიტის აცილებას ეხმარება, კარიესის საწინააღმდეგო ეფექტი აქვს, გულის კუნთს აახალგაზრდავებს და ინფარქტისგან იცავს.

კულინარიული რჩევები
წნევა და ქოლესტერინის დონე ნორმალური რომ იყოს, გაითვალისწინეთ აშშ–ის ჯანმრთელობის ეროვნული ინსტიტუტის რეკომენდაციები: მარილის მოხმარება შეზღუდეთ (საკვები ლიმონით, მწვანილით, ღვინითა და სანელებლებით შეკმაზეთ); რაციონში ცხიმოვანი პროდუქტები (ნაღები, კარაქი, ცხიმიანი ყველი, ნებისმიერი შემწვარი საკვები) შეამცირეთ; მოამზადეთ მსუბუქი კერძები (მოშუშეთ, მოხარშეთ, ზედმეტი ცხიმი მოაცილეთ).

კვების გეგმა, რომელიც ჰიპერტონიისა და გულ–სისხლძარღვთა დაავადებების რისკს ამცირებს:

• ბოსტნეული – 4–5 ულუფა დღეში;
• ხილი – 4–5 ულუფა დღეში;
• რძის მჟავე პროდუქტები – 2–3 ულუფა დღეში;
• მცენარეული ცხიმები – 2–3 ულუფა დღეში;
• მარცვლეული და პარკოსნები – 1 ულუფა დღეში;
• თხილეული და თესლები – 4–5 ულუფა კვირაში;
• ხორცი, ფრინველი, თევზი, ზღვის პროდუქტები – 2 ულუფა კვირაში.