სასარგებლო რჩევები

სხეულის სტრატეგიული ობიექტი

სხეულის სტრატეგიული ობიექტი
https://lh5.googleusercontent.com/-S7k6lwkE3zY/Ty1XP36wVrI/AAAAAAAABac/x54_mpmXyqE/s250/care-neck.jpgყელ–კისერი სტრატეგიული ობიექტია. სხეულის ამ პატარა ნაწილზე თავმოყრილია იმდენი მნიშვნელოვანი ორგანო, რომ მათი მცირე დაზიანება სიცოცხლეს რეალურ საფრთხეს უქმნის. უთვალავი კუნთი და ფაქსია (თხელი გარსი, რომელიც კუნთებს ფარავს) წარმოქმნიან ძვალ–კუნთოვან ღრუს, რომელშიც კომპაქტურად განლაგებულია ხორხი და ტრაქეის ნაწილი, ფარისებური ჯირკვალი, ხახა და საყლაპავი მილის საწყისი. ყელ–კისრის მიდამოს გავლით ასევე ზურგის ტვინი, მსხვილი არტერიები, ნერვული ფესვები და ღეროები გადის. აქვე ლიმფური ძარღვებისა და კვანძების მთელი ბადეა.
სუსტი რგოლი
ადამიანები, რომლებიც ხანგრძლივი დროის განმავლობაში დაძაბულ–ფიქსირებულ პოზაში თავდახრილნი მუშაობენ (თერძები, კონსტრუქტორები, პროგრამისტები, მძღოლები, რედაქტორები, ხარატები და ა.შ.), ყველაზე მეტად კისრის ოსტეოქონდროზის განვითარების რისკის ქვეშ იმყოფებიან. ამავდროულად იტანჯება ხერხემლის არტერია, რომელიც სისხლით ამარაგებს ტვინის ისეთ მნიშვნელოვან სტრუქტურებს, როგორიცაა ღერო და ჰიპოთალამუსი. კისრის მე–6 და მე–7 მალების მიდამოში კისერს თანდათან ცხიმი ედება, რაც მის მოძრაობას ზღუდავს.
უმნიშვნელო, მაგრამ რეგულარული და ხანგრძლივი დაჭიმვა–დაძაბვის დროსაც კი, კისრის კუნთებში სისხლის მიმოქცევა ირღვევა, მალებს შორის სახსრებზე დატვირთვა არათანაბარი ხდება. ეს მალებშუა ხრტილოვანი დისკების (ბუნებრივი შუასადები–ამორტიზატორები, რომლებიც ზედა მალას საშუალებას არ აძლევს, ქვედას ძლიერ დააწვეს და ტრავმა მიაყენოს) გაუწყლოებასა და გამოფიტვას იწვევს. ამის გამო მალების კიდეები ერთმანეთს სულ უფრო მეტად უახლოვდება (ზოგჯერ მათზე წანაზარდი ვითარდება), ნერვული ფესვების გამოსვლის ადგილი ვიწროვდება და შედეგი კისრის მეტად მტკივნეული გაშეშებაა.
სავარჯიშოები კისრის ოსტეოქონდროზის პროფილაქტიკისათვის
1. ღრმად ჩაისუნთქეთ, ორივე ხელის თითები ერთმანეთს გადააჭდეთ და კეფას დააჭირეთ. ხელები ჩამოუშვით, კისრის კუნთები მოადუნეთ.
2. ჩაისუნთქეთ, ხელისგული საფეთქელზე დაიჭირეთ, კისრისა და მხრების კუნთები მაქსიმალურად მოადუნეთ. იგივე გააკეთეთ მეორე ხელით. თითოეული სავარჯიშო 7–7 წამი 3–ჯერ გაიმეორეთ.
3. თავი და მხრები დაჭიმეთ. თავი გვერდზე მაქსიმალურად და ნელა მიაბრუნეთ (5–ჯერ თითოეულ მხარეს).
4. თავი მკერდზე დახარეთ. კისრის კუნთები მოადუნეთ. ეცადეთ, ლავიწი ორივე მხარეს ნიკაპით "გახეხოთ". მოძრაობის ამპლიტუდა თანდათან გაზარდეთ. სავარჯიშო 10–ჯერ შეასრულეთ.
5. თავი უკან გადააგდეთ. სახისა და კისრის კუნთები მოადუნეთ. ეცადეთ, კეფით კისრის ქვედა ნაწილი "გახეხოთ" (10–ჯერ).
6. მხრები მოადუნეთ და დაუშვით. თავის თხემი მაღლა აჭიმეთ, კისრის მალები დაჭიმეთ. ამავდროულად ფრთხილად, პატარა ამპლიტუდით თავი მარჯვნივ და მარცხნივ მიაბრუნეთ (5–ჯერ).
რაც შეეხება თავის წრიულ ტრიალს, ეს ექიმის კონსულტაციის გარეშე არ ღირს – შეიძლება კისრის ტრავმა მოჰყვეს.
სავარჯიშოები მდგომარე ან მჯდომარე მდგომარეობაში დღის განმავლობაში რამდენჯერმე სრულდება. ნუ დაგეზარებათ, მთელი კომპლექსი 7–10 წუთს წაგართმევთ, სამაგიეროდ კისერი თქვენს თავს მყარად დაიჭერს და ოსტეოქონდროზს თავიდან აგაცილებთ.